Temana I

Kwa ntlongya ga Maleke. Go tsena Maleke le Molotlhanyi le Segokotlo.

Maleke: Fa lo mpona nkile ka bo ke le motho,

Ke le motho, ke le matsosa-di-robetse,

Ke tsosa mahuma masigo a letse;

Ke se na le motho go twe o bogale,

Ke mo role mokobori fela a ntebile.

Jaanong ga ke itse sepe se Kgosi e se dirang,

Motswasele ga a na morero ope le nna;

Ke bona go setswe go dirwa ke sa itse;

Mafoko ke a utlwela kgotleng le bontsi.

Ke busitse le dikgosi di le dintsi,

Ke tlhabanetse lefatshe leno gantsi,

Merero yo lone ke tshwanetse go e itse.

Molotlhanyi: Ga ke re o gakologelwa motho yo

Re kileng ra mo tshwara mo ntweng ele

Ya rona le Bakgatla ba-ga-Kgafele?

Ntwa e Legwale o e loleng le Bakgatla kwa Sefikile?

O tla gakologelwa e rile ke ntse ke mo disitse,

Ka tlhaselwa ke diganka tsa Bakgatla di le tharo.

Bolelela Segokotlo jaaka ke ne ka tlhabana.

Ke ne ka tlhabana jaaka nare e tlhasetswe ke ditau;

Ka bolaya Bakgatla ba le babedi;

Mme ka go twe setshwarwa ke ntsa-pedi ga sethata,

Ke ne ka nanoga ka tshaba.