Temana I

Kwa botlhabanelong, fa kgotlengya ga Diratsagae. Batlhabani ba ora molelo, go maitiso.

Diratsagae: Sebolai, motsadi o go sele leina a re,

O “Sebolai sa baba ba Mmuso wa Kgosi”.

Ka moso o bolae, o se ka wa bolawa.

Sebolai: Go tsoga go le rnaswe, Diratsagae, Mokwena,

O tsoga o kopana le Moruakgomo a ga Tshosa.

Diratsagae: Yoo re ilana lekonkong;

Re ilana sa ntša le phiri

Sebolai: Mme ka lo ilana gale, ke a leboga,

Marumo a tsoga a rutha, a ba a laboga.

Diratsagae: Aaa, seo ke’boammaaruri, Sebolai.

Ke tlelwa ke kgakalo jaanong, Sebolai!

Ke ntse ke tukela pele fela, Sebolai !

Ooho ! Digai tsoo re tswela kae, Sebolai !

A ntwa e siame le fa go ntse jalo?

Sebolai: A o ka mpotsa fa ntwa e siame?

Kana ke wena moipoki wa maabane

Yo o iphakileng, wa ba wa ipholola.

Leboko ke leina la bobelo-kgale ntweng,

Mme jalo o tshwanetse go boo itse

Tshiamo le botlhoka-tshiamo jwa ntwa,

Ka o na le maina a gago a a supang

Bobelo-kgale jwa gago mo tlhabanong.