Temana I

Kwa ntlong ya ga Moruakgomo. Go tsena Molotlhanyile Moruakgomo, ba tla ba tswa motseng.

Moruakgomo: Setilo ke seo, Molotlhanyi, nna fatshe o ikhutse. Mosadi wa me ga a yo mo gae, o ile masimo maloba.

Molotlhanyi: Ke a itumela, Morena, ke tla itapolosa, ke lapile.

Moruakgomo: E rile re tsena ntlong wa bo o sa bua sengwe.

Molotlhanyi: Ke ne ke re Legwale jaanong o mo phupung,

Legwale o mo lebitleng, ga a na go boa,

Jaaka letsatsi ga a na go tlhaba gape;

O tla busa le ba ba mo mmung;

Gape batho ga ba na go tlhola ba bua

Ba re Legwale ke kgosi ya bone.

Moruakgomo: Wena wa re Legwale o sule,

Mme nna ka re Legwale o a tshela,

Legwale jaaka re bua o na le rona,

O na le rona gone mo motseng ono.

Molotlhanyi: Ka re Legwale o mo phupung,

Diboko di mo ja dinamana,

Di setse di mo mona marapo.

Moruakgomo: A ke go re, rra, o a lebala,

Ao lebala fa a tlogetse ngwana wa lekau,

Yo Bogosi jono e leng jwa gagwe?

Molotlhanyi: Ehe! O tla mo naya Bogosi jwa gago?

Moruakgomo: Ga se jwa me, jwa ga Motswasele.

Molotlhanyi: Bogosi, Moruakgomo, jwa yo o thata,

Bogosi jwa yo o nang le lekoko;

Gase kgomo, bo a ikgamelwa,

Bo gangwa ke beng go tshwanele,

Go ba re tlhoo go se ke go ba rone;

Kgosi e swela kwa dithoteng,

E swa e swele kwa gare ga lefatshe,

E tie e jewe ke manong dinama,

E jewe ke nonyane tsa legodimo.

A o batla go etsa ntša ya mokgee,

Wa etša ntsa ya mokasi wa sia,

Wa sia ka mogatla o le maparapareng?

Bogosi o bo beilwe ke Modimo wa gago,

O bo beilwe fela jaaka ene Motswasele,

Bo tshware, o bo tshwarele ruri.