LUX calor uis nobis effosso carbone oleoque exhausto his temporibus expediri solent; recentius in usum uenit materies primo aliquantum neglecta,

nec mirum si neglecta erat ea quae non facile in usum e fonte uehi posset nisi tanto frigore affecta ut in liquorem uersa esset; tum uero paulo expeditius commearet. sed uasa quali metallo quanta arte diligentiaque conflata id frigoris sustinebunt? quomodo in uas immittetur liquor, haurietur e uaso? quae denique corbita onere tam leui accepto fluctibus et uentis afflicta recto malo sospes euadet? aderat uir multum in eius modi rebus expertus, sagax, consili potens: nauem alueis alteris intus ornauit, quo et tutius ab externo periculo onus esset et grauius quid inter primum et alteros alueos pro saburra ueheretur; feruminandi autem ingenti labore curauit ne noceret aliquid metalli uitium. inter nautas tunc cietur metus, ne ‘quassatis undique uasis diffluere umorem et laticem discedere’ posset. Ego nauem, inquit, sic ornaui: ego uos in naue comitabor. fit cursus ille primus sine tumultu nisi quod tempestates non paruas Oceanus excitauit.

quid multa? in re mefitica gerenda usque ad summam ascendit potestatem atque in pretio rem esse auctoritate et constantia multo maiore coegit quam iis placuit qui tum rem publicam gerebant: quibus tamen haudquaquam cedit, sed potius

idem cum multa alia pro re publica gessit tum fabrorum academiam regiam, fama dignissimam, ipse Daedalus inter fabros instituit.