Ho hlaha diboni tse pedi. Ke banna ba tsofetseng, ba tsamayang ba ikokotlela ka mare. Le ha ba bua, ba bua ba itshetlehile ka mare.

Moboni: Maobane, kajeno le hosasa! Ngwahola, monongwaha le isao!

Ke rona ba ithetsang ka ho arola nako dikotwana.

Nako ke noka e sheshang feela, e phatlaletseng, e ke keng ya arolwa dikoto le dikotwana.

Kajeno re a arola: re bua ka maobane, le ka hosasa.

Monongwaha re a hetla: re bua ka ngwahola le ka isao.

Empa hosasa le isao re tla be re bua kang?

Seboni: Hosasa, kajeno e tla be e le maobane, hosasa e le kajeno.

Isao, monongwaha e tla be e le ngwahola, isao e le monongwaha.

Kajeno le maobane e tla be e le ntho e le nngwe.

E tla be e le nako e fetileng, e sa kgutleng.

Kamoso? Kamoso hosasa e tla be e le maobane.

E tla be e le ntho e le nngwe le kajeno le maobane.

Hosasa, kajeno, maobane, tsena e tla ba ntho e le nngwe:

Nako e fetileng, metsi a pha.

Moboni: Rona? Rona ba kajeno? Rona re tla ba eng? E, le rona re tsamaya le matsatsi a rona.

Re a sesa re bile re theoha le metsi a noka ya nako.

Re ka ikarola dikoto le dikotwana jwalo ka nako,

empa re a ithetsa: hobane wa hosasa le kamoso, wa maoba le maobane, wa kajeno: bana kaofela ke ba nako e le nngwe, nako e sa arolweng.

Ba ntse ba tshwana hobane botho bo ho bona bo bong.

Diphoso tsa kajeno ke tsa hosasa, tsa maobane tsa kajeno.

Seboni: Ha ho le jwalo na ha re ithuta tsa maobane re ke se pheme tsa hosasa re eso di etse? Jwale ka ha nako e le nngwe, e le noka,

Ho a tshwaneleha hore re phahamise mahlo,

Re lelalle hodimo mabopong ao noka e seng e a fetile,

Re lekole, re shebe tse etsahetseng teng. Mohlomong mona le mane re tla bona

lejwe la kgopotso, la se etsahetseng kgalekgale;

Se ka nnang sa etsahala kajeno kapa hosasa.

Kgopotso tse jwalo di re hopotsa bobe boo re ka bo phemang,

kapa bona botle boo re ka bo phetang hape.