Senkatana o ka tlung jwalo ka 1(2). O dutse a shebile ka pele ho yena. Ho bonahala ka ho qhalaka matsoho hore o a nahana. Ho sa le jwalo ho kena mmae ka letsohong le letshehadi. Empa ha a mmone ha a kena. Mmae o a ema hoba a kene, mme o sheba mora. O bona kamoo a ntseng a nahana kateng. Kamora metsotswana Senkatana o elellwa hore motho o teng. O a hetla mme o bona mmae.

Senkatana: Ho jwang he, mme? O a bona hore ke ne ke bolela nnete ha ke re thabo ya nnete e fumanwa ha ba bangata ba nyakalletse. Na o ikutlwa o thabile ha e le mona ka hohle e le nyakallo na?

Mmaditaolane: Potso eo ke e lebisa ho wena.

Senkatana: Nna ke tla nyakalla ha eba wena o nyakalletse.

Mmaditaolane: Hona jwale ha ke kena mona se neng se o nahantsha, se etsa hore o qhalake matsoho, ke hobane ke sa thaba? O ne o tsebile jwang hore ha ke a thaba o eso mpone?

Senkatana: Ke ne ke ntse ke nahana hore mohlomong o maswabing hobane o le mahlomoleng. Ke a tseba hore le wena o ne o lebelletse hore hara bohle ba pholositsweng o tla fumana ntate. Le nna ke ne ke lebelletse jwalo, empa madimabe e bile a rona. Empa le ha ho le jwalo re tshwanetse ho nyakalla le ba bang.

Mmaditaolane: Ngwanaka, ba bang lefatsheng mona mahlomola ba phela le ona ka mehla. Le rona re jwalo, ekare re phelela ona feela. Ha e le lefu la ntatao nka be ke itokiseditse ho le lebala. Ke itshedisa ka hore ke na le mora ya tla nka sebaka sa hae, ya tla phetha mesebetsi yohle e neng e le ya ntatae. Empa ke bona hore le ona matshedisonyana a ka ke tla a amohuwa …

Senkatana: Ha ke utlwisise hantle seo o se bolelang mme.

Mmaditaolane: Moya wa ka o a tshwenyeha. Ke wena feela ya ntshaletseng hona jwale. Ke wena thaka ya leihlo la ka. Ha ho ka lahleha thaka ya leihlo la ka e tla ba le ile, matla a ho lona e tla ba a ile.