Bulane le mosadi wa hae ha dutse ka lapeng mme ba a bua. Bulane o dutse hodima kutu ya sefate pela lebota. Mmadiepetsane, mosadi, o adile moseme pela lebota le shebaneng le leo Bulane a dutseng pela lona.

Mmadiepetsane: Jwale, ntate, o tsamaile jwang mosebetsing ola oo re neng re bua ka wona?

Bulane: Ke hona ke ntseng ke leka ho kopanya batlatsi ba tla nthusa. Ke ba lebelletse hona jwale. Mosebetsi o jwalo ha o phethwe ke motho a le mong, ho hlokahala batlatsi.

Mmadiepetsane: Tseo re a di tseba. Empa ke hore nako ena kaofela o ntse o dikadika o re o batla batlatsi? O lenama hakaakang mosebetsing oo? Hle mesebetsing e meng o hle o phakise?

Bulane: Ke mesebetsi efe eo ke hleng ke phakise ho yona?

Mmadiepetsane: O batla ke be ke e bolele? Nkeke. Empa hona jwale ha ho ka thwe ‘kgomo ke tsena, tsamaya o yo batla mosadi wa bobedi,’ o ka tlola matjato!

Bulane: Banna, mosadi eo o a kula! Ke itse ke batla mosadi wa bobedi! Ke a bona o etswa ke hona hobane ke hloka mosadi wa bobedi eo nka o bakisang ka yena ha hlooho ya hao e sila. Haese ke simolle ke ipatlele!

Mmadiepetsane: Ke tsebile hore ke sona se pelong ya hao. Rona ba bang ha re robale, re sesa masiu re nahana maqheka ao re ka o hodisang ka ona, ra o etsa motho ya hlomphuwang ke batho kaofela, motho ya nang le seriti, motho ya okametseng setjhaba sena se hlokang modisa ya nepahetseng. Empa bakeng sa hore o re thuse, re lwane ntwa ena mmoho, ke moo o nahanang sethepu, ntho e sa tlo o thusa ka letho.

Bulane: Ke mang ya nahanang sethepu? Ha ke re ke tena ke bua ka sona tjena ke hobane o nkeme kamorao. Hape ha se bile ha se hore o batla ho phahamisa nna, o mpa o batla hore ke tswele pele ka morero o mobe ona hobane feela o hloile mma Senkatana. Le yena ha o tsebe hore na o mo hloetseng, ke hobane feela ntatae le ntatao bane ke ba qabana. O mpa o batla ho iphetetsa feela. Ke pelo ya hao e mpe.