HUIUS mundi, ut C. ait Plinius, extera indagare nec interest hominum nec capit humanae coniectura mentis, furor est, profecto furor, egredi ex eo et scrutari extera, quasi uero mensuram ullius rei possit agere qui sui nesciat aut mens hominis uidere quae mundus ipse non capiat. ecce qui sic furit, sapientiae multorum euersor. huic enim quippe philosopho bene conuenit multitudo mundorum quo confugiat: nam coniectura illa capta, dummodo ea probabilitate qua noster habentur esse, ea quae solitis condicionibus difficiliora esse uideantur fieri potest ut his aliis disceptata soluantur. quae ratio mundorum possibilium nuncupatur.

sic optime de argumento Anselmi conscripsit, quod in propositiones tam iustas redegit ut nihil clarius, nihil aequius uideretur esse, easque tam cottidiano sermone distinxit ut uis ratiocinalis paene incautum corripiat. exempla undique excerpit: nam querela inuenta, quam admodum barbare effutiuit praedo quidam australis, ad illud explorandum utitur obstringine ita iureiurando probus homo possit ut mentiri coactus improbus esse uideatur.

philosophorum qui nunc sunt nemo tam multa tam uaria tractauit eaque tam inter se concinentia ostendit, quorum multa quae iunior posuit si cui sunt improbata probat senior. qui si non in hac aula nunc esset, mallet fortasse in tertio eo ordine esse ubi per speculum transgressa Alicia carro publico uehebatur – nisi quod illa eiecta est, sed hic nescio an usque quadratum circuire uel circulum quadrare potius uellet, sermone locuplete salibusque uariis incitatus et occasionibus ratiocinandi infinitis.

praesento uobis Philosophiae apud Princetonenses Professorem,

DAVID KELLOGG LEWIS

“TO hunt for things outside this world’, said the elder Pliny, ‘holds no interest for man, nor can man's mind hypothesise appropriately.