HUIUS aedifici columnas artifices striis et quadris, antiquo more freti, ornauerunt, quo sol diurno ambitu ita lucem et umbram diffundit ut non e mortuo lapide factae esse sed uiuo apricoque uideantur. quae iampridem Phidiae Ictino Callicrati, eadem huic fere cognita sunt, nisi quod non solido lapide sed tabulis planitieque operata demonstrat.

praemia huic artis multa, quorum non minimum fuit illud a Venetis olim datum; sed his prioris quoque temporis agnouit gratias cum in foro stare fertur, marmore uario constrato; pluere, et dum pluit uideri non aquam modo, quae huc illuc super lapides diffunderetur, sed etiam pauimenti subiacentis speciem tremere et moueri. quo uisu elata formas rerum ui quadam Academica tractabat et albo nigroque tantum usa coloribus ita constrinxit ut non stare qua quidque sit forma sed ideo turbari spectantis oculo uiderentur. hinc hausit artem suam.

sed colores paulatim redierunt, et qui colores! quam puri, quam dilucidi! quos Thebis Aegyptiis primo conspexisse in sepulcris artificum dicitur, qua per multa saecula nullus nisi minii ochrae uitri ueneti uiridis mos fuerat. his saepe usa est in uirgas iuxta dispositis, non multo dissimiles columnarum quas supra memorauimus striis et quadris ornatarum; recentius autem lineis nouis additis, iisque obliquis, ad oculum diuersius excitandum rectas secuit.

in oculo spectantis pulchritudinem ferunt inesse. haec ipsum spectantem commendat oculum, ipsum intelligentem docet.