Toe Dingiswayo tuis kom, het hy die leërs en die manskappe verdaag sodat hulle na hul tuistes kon teruggaan om te rus. Maar Zwide, wat nog steeds die wrok in sy hart vertroetel het oor sy skande, val toe sonder waarskuwing aan. Toe Dingiswayo daarvan hoor, was Zwide alreeds by die Mfolozi-rivier. Dingiswayo trek Zwide toe tegemoet met ’n klein klompie vegters om te verhoed dat hy sy stad binneval. En ’n bevel is uitgereik en die leërs is inderhaas opgeroep om die koning te hulp te snel. Dingiswayo en die klein groepie vegters wat hy by hom gehad het, was moeg na die oorlog teen Matiwane en die baie troppe vee wat hulle gebuit en terug gebring het. Daarom het die geveg hulle oorweldig terwyl dit nog aan die begin was. Koning Dingiswayo is gevolglik gevang. En toe Zwide by sy tuiste aankom, het hy Dingiswayo doodgemaak, sy kop afgekap, dit op ’n stok se punt vasgemaak en dit in die nag na Dingiswayo se tuiste laat neem, waar die gestuurdes dit in die hof staan gemaak en sy skild daarteen aangeleun het. En toe die mense die volgende dag uit hul huise kom, was hulle verskriklik geskok oor wat aan hulle koning gedoen is.

Toe Chaka hoor dat Dingiswayo gevang is, het hy vinnig te werk gegaan en haastig ’n paar hardlopers na Zwide gestuur met die versoek dat Dingiswayo nie doodgemaak moet word nie, en dat hy ’n losprys vir hom sou betaal met enigiets op die aarde wat Zwide begeer. Maar sy gesante het nooit by Zwide uitgekom nie. Ndlebe en Malunga was reeds by die koningstad en het gou die nuus versprei dat Dingiswayo om die lewe gebring is, hoewel hy op daardie tydstip nog nie doodgemaak was nie. Die gesante het gevolglik gesien dat dit nie sou help om verder te gaan nie. Chaka en sy gevolg haas hul nog in aller yl na die koningstad, maar toe hulle daar aankom, hoor hy die pynlike nuus van die dood van Dingiswayo.