Die dag dat Chaka weer baie vroeg moes gaan bad, het aangebreek, en hy het inderdaad rivier toe gegaan terwyl dit nog baie vroeg was. Sy ma het saam met hom gegaan, omdat sy die slegte gees onder die mense gesien het. Geen mens het geweet dat Chaka op ’n bepaalde tyd moes gaan bad nie. Toe hulle by die rivier (die Wit-Mfolozi) kom, het sy ma naby die plek gaan skuil waar Chaka gebad het. Die leser moet onthou dat dit in Bokone nie ’n skande was as ’n moeder haar seun kaal sien swem nie, want in Bokone is daar nie klere gedra nie.

Chaka het homself gewas en toe hy byna klaar was, begin die kuif op sy kop skielik heen en weer skud en tol; die kopvel daaronder het warm gevoel en gou-gou begin rimpel, en net so gou het die vel weer tot bedaring gekom en botstil geword. Dit was nog baie, baie vroeg, lank voor sonop; en hy het op ’n gevaarlike en skrikwekkende plek geswem. Aan die bokant van waar hy hom bevind het, was daar ’n groot waterval, en onder daardie waterval, net daar waar hy was, ’n reusagtige poel, ’n vreesaanjaende kuil, met donkergroen, baie diep waters rondom die waterval. In die poel was die water pikswart! Aan die oorkantste oewer, reg langsaan hom, maar steeds in die water, was daar ’n groot grot, ’n swart, donker tonnel met ’n afwaartse helling waarvan ’n mens die einde nie kon sien nie. Die bodem van die diep poel kon nie gesien word, ook nie waar dit eindig nie, want onderkant die poel was die water aan albei kante met digte riet begroei; en aan die oorkantste oewer het die bos die heuwelhang oorgroei en in die rivier geëindig; die bos was baie dig en ruig verstrengel, ’n ware boskasie. Dit was ’n verskriklike plek, selfs in die dag verskriklik, waar ’n mens dit glad nie alleen kon waag nie; waar alleen die tikoloshe dit kon doen. Chaka het homself daar gewas, want hy was Chaka.

Chaka plas toe weer in die water, en skielik het die breë rivier se water in die poel begin skommel en groot golwe gemaak; dit golfgolf, die golwe sprei en styg, en hy sien dat dit hom gaan oorweldig. Toe begin hy om pad te gee uit die poel en die water te verlaat.