[Fol. 178 r.]

Hie vahet an daz leben vnd lesen der kunigen Angnes von Behem, die in sant Claren orden lebet sechs vnd viertzig jar in volkumner seligkeit vnd übung aller tugend; vnd ist als ir leben hie geschriben vnd begriffen in trizehen sch[t]ucken oder capitel mit gar kurtzen worten durch daz, das die es lesen oder hörent lesen vrsach werd genumen alles vrtrutz, vnd doch alle andechtige hertzen erman an zeheben zu loben den ewigen got vnd sein wunder zu erkenen, der so gar wunderlich gewirckt hat mit einer so gar hochen fürsten. Das erst capitel ist von ir kintheit, wie sie gelept hat. Daz ander, wie heiligklich sy da lept nach irs vater vnd muter tod, do sy by irem bruder was, der kunig nach irem vater was. Das tryt, wie sie in sant Claren orden kam. Daz vierd, ∣ von ir grossen demuttigkeit vnd von ir gehorsam. Das funfft, von ir waren vnd willigen armůt. Das sechst, von der strenge vnd grosse kestigung, die sy ir selbs an det. Das subent, von irem gebet vnd von ir andacht, vnd von der andacht die sy zu vnsers herren fronlichnam het. Das acht, von der inbrinstigen inhitzigen mynn, die sy zu den schwestren het vnd zu allen denen, die in beschwerd vnd arbeit warent lybs oder hertzen. Daz zehent, von der offnung heimlicher ding die ir von got geoffenbart ward. Das eilft, von irem end vnd wie sy begraben ward. Daz zwelft, von den zeichen die nach irem tod geschachen.