[Fol. 139 v.J

Dise brief sant die selig Sand Clar der edeln kvniginn der heiligen jvnkfrawen Agnesen, des aller edelsten kvnges tohter von Pehaim, die da waz ze Brag in ainem closter Sand Claren ordens do Sand Clar dennoch lebt auf ertreich, ze manen vnd ze leren vnd ze sterken disev vorgesprochen jvnkfrawen Sand Agnesen an dem dienst gotes, vnd an strenkait des ordens, vnd auch zv ainem vrkvnde gaistleicher lieb die si zv ir het: dar vmb sant ir Sand Clar dise brief die her nach geschriben sten.

[Fol. 139 r.]

Der ersamen vnd aller heiligsten jvnkfrawen Agnesen, der ∣ tohter des aller wirdigsten vnd edelsten kvnges ze Pehaim, enbevt Clara, ain vnwirdige dienerin Jhesu Cristi vnd ain vnnvtzev dirn der beslozzen frawen des closters Sand Damians von Assis, ir vnderta vnd dirn allenthalben, enpfilhet sich selben ir in alle weise mit gaistleicher wirdikait vnd wunschet ir daz si erwerbe vnd verdien die ere der ewigen selikait.

[Fol. 140 r.]

Ich hab gehöret den leimvnt ewres aller heiligsten wandels vnd aller erwergsten lebens der ist auch endleichen erhollen niht mir alain, svnder nahen in allem vmbringe der werlt, vnd da von frewe ich mich vil in vnserm herren vnd pin vro. Von dem ∣ ich mich niht alain mag frewen, halt alle die da tvn und begern ze tvn den dienst Jhesu Cristi.