Littere Exemplificatorie Regis Edwardi Tertii

Edwardus dei gracia Rex Anglie Dominus Hibernie et Aquitannie omnibus ad quos presentes litere pervenerint salutem. Inspeximus placitum et processum habitos coram baronibus de scaccario nostro in hec verba: Placita coram baronibus de scaccario de octabis sancti Martini anno regni Regis Edwardi tercii post conquestum quadragesimo. Prior de Caldwelle venit coram baronibus xviij die Novembris hoc termino per Iohannem de Roderham attornatum suum et queritur per billam de Edmundo Litester ballivo ville Cantebrigie presente super compoto suo de debitis domini Regis levabilibus intra libertatem eiusdem ville reddito hic (sic) modo in octabis sancti Martini pro hominibus ville predicte de eo quod cum maior et ballivi predicte ville Cantebrigie qui pro tempore erunt reddent prefato priori annuatim xii marcas x solidos pro tercio denario firme ville predicte quos quidem xii marcas x solidos dominus Iohannes dudum Rex Anglie progenitor domini Regis nunc assignavit comiti David et licet idem ballivus integram firmam ville predicte levaverit et idem prior ipsum ballivum solvendi ei redditum illum sepius requisierit, idem tamen ballivus colore officii sui redditum predictum de duobus annis proxime preteritis videlicet quolibet anno xii marcas x solidos penes ipsum detinet et inde nichil predicto priori solvere voluit set solucionem redditi illius contradixit et adhuc contradicit unde deterioratur et dampnum habet ad valenciam xl librarum : Et hec offert &c. : Et predictus ballivus presens &c. : […]