[318] Tuesday 7 February 1626

Convocatio sive concilium provinciale reverendissimi in Christo patris et domini Domini Tobiae, providentia divina Eboracensis archiepiscopi, Angliae primatis et metropolitan, ac ceterorum praelatorum et cleri civitatis, dioeceseos et provinciae Eboracensis auctoritate brevis excellentissimi in Christo principis et domini nostri Domini Caroli, Dei gratia Angliae, Scotiae, Franciae et Hiberniae regis, fidei defensoris etc., convocatorum inchoata sive inchoatum septimo die mensis Februarii anno Domini (iuxta cursum et computationem Ecclesiae Anglicanae) millesimo sexcentesimo vicesimo quinto, regnique dicti domini nostri regis anno primo, in domo capitulari ecclesiae cathedralis et metropoliticae Beati Petri Eboracensis, inter horas nonam et undecimam ante meridiem eiusdem diei, coram venerabilibus viris Iohanne Scott, decano dictae ecclesiae, Gulielmo Easdall legum doctore, et Matthaeo Dodsworth in legibus baccalaureo, cancellario curiae audientiae dicti reverendissimi patris apud Eboracum, Phinea Hodgson, sacrae theologiae professore, Henrico Wickham, archidiacono Eboracensi, et Thoma Bell clerico, in artium magistro commissionariis dicti reverendissimi patris, ad praesidendum in synodo sive convocatione provinciali praelatorum et cleri totius provinciae Eboracensis legitime deputatis, in praesentia mei Richardi Brooke, notarii publici.

Quibus die, horis et loco, lecto publice per me Richardum Brooke, notarium antedictum, brevi dicti serenissimi principis domini nostri regis pro hac convocatione isto die celebranda dicto reverendissimo patri directo, et etiam exhibitis eisdem venerabilibus viris Iohanni Scott, Gulielmo Easdall, Matthaeo Dodsworth in legibus baccalaureo, Phineae Hodgson, Henrico Wickham, et Thomae Bell, literis honorabilibus commissionalibus praefati reverendissimi patris domini Eboracensis archiepiscopi ad praesidendum vice, loco, nomine et auctoritatem [sic] eiusdem reverendissimi patris in huiusmodi convocatione eis et aliis coniunctim et divisim directis, eiusque sigillo archiepiscopali sigillatis, iidem venerabiles viri Iohannes Scott, Gulielmus Easdall, Matthaeus Dodsworth, Phineas Hodgson, Henricus Wickham, et Thomas Bell, ob reverentiam et honorem tanti reverendissimi patris committentis, onus executionis earundem literarum commissionalium in se susceperunt, ac pro iurisdictione sua necnon de procedendo in omnibus et per omnia iuxta vim, formam, tenorem et effectum earundem decreverunt, et denuo praeconizatis publice omnibus et singulis in huiusmodi convocatione sive synodo provinciali comparere de iure et antiqua consuetudine in hac parte usitata et observata debentibus, comparuerunt [319] vel non, prout in schedula eorum nomina et cognomina in se continente plenius specificatur et declaratur.