Mwaka 2004 nilialikwa na Chuo Kikuu cha Transkei ambacho sasa kinaitwa Chuo Kikuu cha Walter Sisulu, Africa Kusini, ili kupokea digrii ya heshima ya uzamifu (au ya udaktari wa falsafa), pamoja na Nelson Mandela na Ali Mazrui. Hafla hiyo ilikuwa pia ni ya kuadhimisha kubadilishwa jina la zamani la Chuo Kikuu hicho, na kupewa jina hilo jipya. Jina lake la zamani, yaani Transkei, lilikuwa na kumbukumbu za utawala wa ubaguzi wa rangi wa kuigawa nchi. Na hilo jina la sasa lina uhusiano na shujaa wa taifa.

Nikiwa pamoja na mke wangu na watoto wawili, tuliwasili kwenye maeneo ya Chuo ambako kulikuwa kumetundikwa mabango yaliyoandikwa HOMECOMING (yaani KURUDI NYUMBANI/ KARIBU NYUMBANI) Niliguswa moyoni: Hiyo ilikuwa ni digrii yangu ya kwanza ya heshima niliyotunukiwa na chuo kikuu cha Afrika, baada ya nyingine kadhaa nilizotunukiwa na vyuo vikuu vya Ulaya na Marekani. Lakini hilo bango la HOMECOMING – ambalo ni jina la kitabu changu kimojawapo – lilikuwa na maana nyingine muhimu. Nilikuwa ninarudi nyumbani Kenya, kwa kupitia Afrika ya Kusini, baada ya kulazimika kuishi uhamishoni kwa miaka ishirini na mbili. Huko kurudi nyumbani kwa kupitia Afrika ya Kusini, kilele chake kilikuwa kiwe Kenya; watoto wangu wawili waliozaliwa uhamishoni walikuwa hawajaigusa ardhi ya Kenya.

Yaliyotokea baada ya siku kumi na moja tangu kurudi nchini kwangu kwa furaha kuu, pamoja na digrii niliyotunukiwa Afrika nikiwa njiani kurudi nyumbani, sasa ni historia. Kurudi kwangu nyumbani kukageuka kuwa ni jinamizi. Mimi na mke wangu tuliponea chupuchupu, baada ya kuvamiwa na watu wanne wenye bunduki/ bastola.

Si makosa ya Afrika ya Kusini, kwamba digrii yangu ya kwanza ya heshima kutoka Afrika pia ina kumbukumbu za ugaidi. Hii ya leo ni digrii ya kwanza ya heshima tangu usiku ule wa ugaidi.

Makamu Mkuu wa Chuo: Mimi ni mwandishi; yaani mimi ni mhunzi wa maneno (au mfua maneno). Lakini nimekosa maneno muwafaka ya kueleza jinsi heshima hii – ambayo Chuo Kikuu cha Dar es Salaam imenipa leo – ilivyo na maana kubwa kwangu. Si kwa sababu tu ya kwamba ni matumaini yangu kuwa nitaweza kuisherehekea digrii hii kutoka Afrika bila ya furaha yangu kufujika; lakini hasa ni kwa sababu ya hadhi ya Chuo Kikuu hiki katika usomi na siasa za Afrika.