Metrum 11

“… And thanne thilke thing that the blake cloude of errour whilom hadde ycovered schal lighte more clerly than Phebus himself ne schyneth. For certes the body, bryngynge the weighte of foryetynge, ne hath nat chased out of your thought al the cleernesse of your knowing; for certeynli the seed of soth haldeth and clyveth within yowr corage, and it is awaked and excited by the wynde and by the blastes of doctrine. For wherefore elles demen ye of your owene wil the ryghtes, whan ye been axid, but if so were that the norysschynges of resoun ne lyvede yplounged in the depe of your herte? And if so be that the Muse and the doctrine of Plato syngeth soth, al that every wyght leerneth, he no doth no thing elles thanne but recordeth, as men recorden thinges that been foryeten.”

Prosa 12

Thanne seide I thus: “I accorde me gretly to Plato, for thou recordist and remembrist me thise thinges yet the seconde tyme; that is to seye, first whan I loste my memorie be the contagious conjunccioun of the body with the soule, and eftsones aftirward, whan Y lost it confounded by the charge and the burdene of my sorrowe.”