The main variants of the 1217 text have been noted but not minor variations (Statutes of the Realm, i, Charters of Liberties, nos. 10, 12).

Henricus Dei gratia rex Anglie, dominus Hibernie, dux Normannie, Aquitanie et comes Andegavie, archiepiscopis, episcopis, abbatibus, prioribus, comitibus, baronibus, justiciariis, forestariis, vicecomitibus, prepositis, ministris, et omnibus ballivis et fidelibus suis presentem cartam inspecturis, salutem. Sciatis quod nos, intuitu Dei et pro salute anime nostre et animarum antecessorum et successorum nostrorum, ad exaltacionem Sancte Ecclesie et emendacionem regni nostri, spontanea et bona voluntate nostra dedimus et concessimus archiepiscopis, episcopis, comitibus, baronibus et omnibus de regno nostro has libertates subscriptas tenendas in regno nostro Anglie in perpetuum.

1. In primis omnes foreste quas Henricus rex avus noster afforestavit videantur per bonos et legales homines; et, si boscum aliquem alium quam suum dominicum afforestaverit ad dampnum illius cujus boscus ille fuerit, deafforestetur. Et si boscum suum proprium afforestaverit, remaneat foresta, salva communa de herbagio et aliis in eadem foresta illis qui eam prius habere consueverunt.[U.C., c. 9; 1215, c. 53.]

2. Homines vero qui manent extra forestam non veniant decetero coram justiciariis nostris de foresta per communes summoniciones, nisi sint in placito, vel plegii alicujus vel aliquorum qui attachiati sunt propter forestam. [1215, c. 44.]

3. Omnes autem bosci qui fuerint afforestati per regem Ricardum avunculum nostrum, vel per regem Johannem patrem nostrum usque ad primam coronacionem nostram, statim deafforestentur, nisi sit dominicus boscus noster.[u.C., c. 9; 1215, cc. 47, 53.]

4. Archiepiscopi, episcopi, abbates, priores, comites, barones, milites, libere tenentes, qui habent boscos suos in forestis, habeant boscos suos sicut eos habuerunt tempore prime coronacionis regis Henrici avi nostri, ita quod quieti sint in perpetuum de omnibus purpresturis, vastis et assartis factis in illis boscis, post illud tempus usque ad principium secundi anni coronacionis nostre. Et qui decetero vastum vel purpresturam sine licencia nostra in illis fecerit, vel essartum, de vastis, purpresturis et essartis respondeant. [U.C., c. 10.]

5. Reguardores nostri eant per forestas ad faciendum reguardum sicut fieri consuevit tempore prime coronacionis predicti regis Henrici avi nostri, et non aliter.