Transcription of an Indenture of War made between Henry of Lancaster, Earl of Derby, and Edward III on 13 March 1345. E 159/123, m. 254d

Ceste endenture faite entre nostre seigneur le roi d'une parte et monsieur Henri de Lancastre, conte de Derby, d'autre parte, tesmoigne que le dit conte, par comaundement nostre seigneur le roi, ad empris d'aler en Gascoygne a y demorer come lieutenant le roi pur un demy an, si guerre soit, et a faire le bien q'il poet ove cink centz hommes d'armes, milles archers, dont cink centz serront a chival et cink centz a pie, et outre cink centz Galeys a pie. Et du nombre susdit deux centz et cinquante homes d'armes et deux centz et cinquante archers a chival serront a la retenance propre du dit conte, c'est assavoir soi, oytisme a banere, quatre vintz et douze chivalers et cent et cinquante esquiers. Et nostre seigneur le roi lui perfournira des gentz d'armes, archers et gentz Galeys tanque au nombre susdit. Et le dit conte ove sa retenance susnomee serra au port de Southamptoun le veille de Pentecost proschein avenir pour passer versus les dites parties de Gascoigne. Et Southamptoun la veille de Pentecost soit le primer jour de demy an avantdit pour acompter des gages et pour touz autres convenances comprises en ceste endenture, s'il ne soit garni par maundement du roi par convenable temps de prendre autre jour par defaute de navire que ne soit mye pleynement venue. Et est l'entencion toutes voies que le jour q'il vendra a la meer sur son passage il commencera d'aconter. Et le dit conte prendra pour lui meismes sys soldz et oyt deniers le jour, pour chescun baneret quatre soldz, pour chescun chivaler deux soldz, pour chescun esquier douze deniers, et pour chescun archer a chival sys deniers; les qeux gages pour sa retenue proper pour le demy an avantdit amontent a quatre mille quatre centz quatre vintz douze livres sept soldz et quatre deniers, et ovesque ce il prendra pour regard pour meisme le temps troys mille treys centz trente et trois livres sys soldz et oyt deniers; les queles summes amontent en tout a sept mille oyt centz vint et cynk livres quatorz soldz, dont il serra paie dedeinz un moys apres la Pasque proschein avenir de cynk mille livres.