The first royal writ

Rex venerabili in Christo patri W[illelmo], eadem gratia archiepiscopo Eboracensi, Angliae primati, salutem. Volentes pridem condescendere precibus et persuasionibus ex parte sanctissimi patris Domini Clementis papae sexti per literas et nuntios nobis factis, de pace seu treugis cum adversario nostro Franciae ineundis, paratos nos obtulimus ad tractandum cum deputandis per dictum adversarium de praemissis, et propter hoc alligatis nostris literas et nuntios transmisimus speciales, sed dictus adversarius noster, qui violatis treugis prius initis fideles nostros depraedare fecerat et interficere, tractatum pacis declinavit, in nostri et nostrorum subversionem coniurans pro viribus et conspirans; propter quod desiderantes tarn discriminosis periculis nobis ac regno nostro Angliae et Ecclesiae Anglicanae, nisi Deus avertat, obviare, magnum exercitium armatorum ad reprimendum ipsius adversarii nostri malitiam, et pro defensione nostri regni et ecclesiae praedictorum necessaria iam ad partes transmisimus transmarinas; nos etiam passagium nostrum versus partes illas propter hoc ordinavimus, sicut oportet, validum et festinum; et quia super his et aliis, nos ac statum, et regimen dicti regni defensionem et honorem dictae ecclesiae et utilitatem reipublicae summe tangentibus, ut communibus periculis per communia consilia obvietur, consilium, auxilium, et avisamentum vestrum suffraganeorum vestrorum ac cleri vestrarum dioecesis et provinciae habere volumus e vicinio; specialiter vos rogamus et in fide et dilectione quibus nobis tenemini, vobis iniungimus et mandamus, quod ad diem Lunae proximum post festum Sancti Andreae Apostoli proxime futurum [2 December 1342] dictos suffraganeos vestros et clerum apud Pontemfractum convocari faciatis; ita quod vos et ipsi sitis tune ibidem super praemissis cum deputandis per nos tractaturi, et vestrum consilium et auxilium impensuri, ulteriusque facturi, quod tune ibidem contigerit ordinari. Et hoc, sicut nos et honorem nostrum diligitis nullatenus omittatis. Dictum autem locum de Pontefracto vobis propter hoc duximus assignandum, quia civitatem Eboracum ante tempus intronisationis vestrae commode, ut dicitur, intrare non potestis. Teste rege apud Eastry tricesimo die Septembris [30 September 1342].

The archbishop's mandate following a second royal writ

Willelmus, permissione divina Eboracensis archiepiscopus Angliae primas venerabili in Christo patri Domino Richardo, Dei gratia Dunelmensi episcopo, suffraganeo nostro, salutem et fraternae caritatis in Domino continuum incrementum.