14 - Isigcawu seshumi nane
Published online by Cambridge University Press: 11 November 2021
Summary
(UMzwakhe usekhaya. Ukhuluma nodadewabo uThandi ngendaba kaZama.)
MZWAKHE: (Ekhuluma yedwa.) Namanje ngisasho, kukhona okuqhubekayo kuZama mina okungafanele ngikwazi. Selokhu ebuyele esikoleni kulo nyaka akusekho ukuxhumana ngendlela engiyaziyo. Nginokumfonela avele angaluphenduli ucingo. Ngiphinde ngishaye kuvele kuthule nya. Uyoze angithinte ngakusasa. Nakhona uzwe nje ukuthi uyaphuthuma, akanasikhathi sami. Uma kukhona okwenzakalayo kudela owaziyo ukuthi iyozala nkomoni! Ngeke nje ngithi ngivuse inyamazane kuvele kuqhamuke omunye umuntu angiphuce yona ngingalindele. Engikwaziyo nje ukuthi oqonywe uZama uqonywe yiliba. (Aphazanyiswe ukungena kukaThandi.)
THANDI: Kwenzenjani bhuti wami? Angikutholi kahle kulezi zinsuku. Kwala ngisho ngithi ngiyakuxoxisa, uvele ube ngumuntu ogxilile ngemicabango. Ukudla kona awusakwazi, usuvele uthi chokochoko ushiye kanjalo.
MZWAKHE: Akukho lutho olutheni wena Thandi. Into nje ngisola ukuthi kukhona okungahambi ngokwezifiso zami. UZama angisamtholi kahle. Ungishintshele, usengomunye umuntu manje, hhayi lo Zama omaziyo.
THANDI: Ubogawula ubheke. Kungenzeka ukuthi kukhona okunuka santungwana. Nami ubengikhonze kabi njengoskwiza wakhe. Bekungapheli isonto engangishayelanga ucingo.
MZWAKHE: (Esecasukile.) Kuzofa umuntu.
THANDI: Kahle bo bhuti ngamawala! Uma kungukuthi usethanda omunye ubovele uxolise inhliziyo. Baningi kabi abantu besifazane. Kobe kusho ukuthi usisi uZama ubengadalelwe wena.
(Endlini kaRomeo kumasabhabhu asePhayindane, uRomeo uhleli noZama. Sebeyathandana.)
ZAMA: Romeo, ngizwa nginokwesaba.
ROMEO: Inkinga ikuphi? Ngabe usaba ukuthi ngiyakukhohlisa uma ngithi ngiyakuthanda, nokuthi ngifuna ukukushada?
ZAMA: Angesabi nakancane ukuthi ungangishiya. Kungicacela kahle ukuthi indlela yami imhlophe qwa lapha kuwena. Inkinga yami yilo Mzwakhe.
ROMEO: Uyinkinga kanjani? Ubungakamazisi yini ukuthi kuphelile phakathi kwenu?
ZAMA: Ngeke ngize ngiqambe amanga. Bengingakaze ngisho lutho kuyena. Bengithemba ukuthi uzobona ngezenzo zami ukuthi seligaya ngomunye umhlathi manje. Ngisaba nokuthi angakwenza isilo sengubo uma engezwa ukuthi ngithandana nawe.
ROMEO: (Engakhombisi ukwesaba.) Kulungile uma ngifa ngifela wena sithandwa sami. UMzwakhe-ke yena uyomtshela ukuthi awusamthandi uma sewunesibindi sokuba umtshele.
ZAMA: (Eciphiza izinyembezi.) Futhi ngiyodinga esikhulu isibindi lesi. Ngiyabonga gugu lami. Ukuba umuntu uyakwazi ukuzihlelela impilo ngangizoqoka ukuhlangana nawe kuqala. Ngangingeke ngisazi lesi sigebengu esinguMzwakhe.
ROMEO: Mhlawumbe kwakumele uhlangane naye ukuze ufunde okuthize. Kumanje usuyazi ukuthi kumele umhlaziye umuntu ngaphambi kokuba uthandane naye. Ungaveli ubuswe yinhliziyo ingqondo uyicindezele.
ZAMA: Impela kunjalo Romeo, uJuliet ukuzwa kahle. Yingakho ngikuthanda ngoba unengqondo ekhaliphile. Sekukaningi ungeluleka. Impilo yami awuyenzi buthaka njengoba bekwenza le nswelaboya enguMzwakhe ebivele ingifuqele ngemali ngoba icabanga ukuthi umuntu wesifazane ubanjwa ngemali. Ake ngiyeke ukudlinza ngalo Mzwakhe. Sengilibele ukuthi ngibeke izimbiza, kungaze kushe kungqongqe ukudla.
(UZama aphuthume ekhishini. Asale yedwa uRomeo ecabanga.)
- Type
- Chapter
- Information
- Iqonde Kuphi le Ndlela? , pp. 173 - 176Publisher: University of South AfricaPrint publication year: 2012