(UZama noMzwakhe bangena indlela eya eBotswana.)

ZAMA: (Ekhuluma yedwa, ezwa imoto epakayo.) Kuyoba nguMzwakhe-ke lowo. Awuthi ngikhiphe ipotimende. (Alidonse ngamasondo alo.)

MAMPANZA: Seniyindlela njalo Zama?

ZAMA: Yebo, sesiyahamba manje mama. Angithi inombolo yocingo lomqashi wakho kuseyiyona lena endala engiyaziyo?

MAMPANZA: Kuseyiyona lena oyaziyo mntanami.

ZAMA: Usale kahle mama. (Baqabulane.)

MAMPANZA: Nihambe kahle bantabami. Niphephe nasezingozini bo!

(Sebesendleleni bayazincokolela ngezabo zothando.)

MZWAKHE: Kuyangijabulisa sithandwa sami ukuhamba nawe ibanga elide kangaka. Ngizizwa sengathi ngizalwe kabusha.

ZAMA: Uma kujabule wena Mzwakhe wami inhliziyo yami ithi cosololo.

(Kukhale umakhalekhukhwini.)

MZWAKHE: (Ephendula.) Kunjani Maziya?

MAZIYA: Ngisaphila. Uzwakala sengathi ususendleleni?

MZWAKHE: Kunjalo mfowethu, sengisendleleni eya eBotswana. Ngihamba noZama, intombi yami.

MAZIYA: Lalela-ke, angithi usazikhumbula izimoto owazishisa ekamu lamaphoyisa aseSwazini?

MZWAKHE: Ngiyazikhumbula. Ngabe kunenkinga?

MAZIYA: Impimpi yami ingitshele ukuthi iwashi lakho owagcina ungenaso isiqiniseko sokuthi likulahlekele kuphi litholakale khona kuleso sinyokotho sezimoto owazishisa.

MZWAKHE: Baze kanjani ukuthi ngelami?

MAZIYA: Ungazenzi ingane wena Mzwakhe. Zonke izinto ezitholakala lapho kwenziwe khona icala zihanjiswa emalebhu ziyohlolwa zicutshungulwe ukuthi zingakwazi yini ukusiza ekutholeni izigebengu, futhi zisebenziseke ekuqiniseni ubufakazi uma sekuyisikhathi sokuthethwa kwecala.

MZWAKHE: Hho, sengiyabona manje. Ukhuluma ngale nto abayibiza ngokuthi yiforensic analysis.

MAZIYA: Ngoba uyazi nje, pho bakusolani ngoba uhlakaniphile! Emva kokuba benze njalo ewashini lelo bathole ukuthi belibhalwe ikheli lakini ngaphansi. Okusho ukuthi amaphoyisa aseSwazini esebenzisana nawalapha eNingizimu Afrika angeza noma yinini kini ukuzophenya ukuthi kwenzeke kanjani ukuba iwashi lakho litholakale kule ndawo okwasha kuyona izimoto.

MZWAKHE: Ngiyabonga Maziya mfowethu. Ngizohlale ngibalindele uma kwenzeka befika. (Avale ucingo.)

ZAMA: Ngubani lona okhuluma naye izindaba zamaforensic analysis? Kukhona inkinga onayo yini?

MZWAKHE: Akukho lutho olutheni. Lona obefonile ubengixoxela enye nje indaba engahlangene nathi.

ZAMA: Akobe akukho lutho olufihlayo weMzwakhe wabantu! Uze wazi ukuthi akukho lutho olufihliweyo olungayukwembuleka.

(Baqhubeke nohambo. UZama azunywe ubuthongo bese kuyathuleka. UMzwakhe yena ulokhu ehlabe amehlo akhe emgwaqeni.)