Baldricus, Burguliensium fratrum abbas, licet indignus, omnibus Christianis pacem et ueritatem diligere. Benedictus dominus noster Iesus Christus, Christiani nominis auctor et rector inuictissimus, et amplitudinis Christiane sapientissimus propagator. Hunc ut benedicatis et in omnibus operibus suis laudetis, oportet, fratres karissimi, et indeficientis sue erga nos misericordie nullatenus obliuiscamini. Ipse reges mutat et tempora, ipse pios corrigit, ut prouehat; ipse punit impios, ut corrigat. Quippe, in quo nichil est immisericordie. Ipse temporibus nostris Christianitatem suam, ubicumque terrarum erat, pene totam excitauit; et ut ad eruendam, in qua specialiter passus est, Ierusalem, de spurcorum manibus Turcorum, qui ei uelut captiue dominabantur, Christiana concurreret militia, fideles suos unanimiter incitauit. Non enim sine diuina inspiratione credendum est, ab Occidentali in Orientalem plagam, omnium rerum copiosos uelle militatum iri; et contra barbaras nationes, relictis prediis et domibus, filiis et uxoribus, brachio suo pugnaturos inter innumeras calamitates gaudenter proficisci. Quis enim tot principes, tot duces, tot milites, tot pedites sine rege, sine imperatore dimicantes eatenus audiuit? Neque siquidem, in isto exercitu, alter alteri prefuit, alius alii imperauit: nemo quod sibi peculiare uidebatur disposuit, nisi quod sapientium commune consultum decreuit, nisi quod plebis scitum collaudauit. Certum est ergo quia spiritus sanctus, qui ubi uult spirat, et ut tantos labores arriperent eos animauit; atque indiscissam eis concordiam inspirauit.