Tenue a sans quinte de guerre

Lonc tans li rois Artus sa terre

Et ot trestous ses anemis

A son voloir desous lui mis,

S'iert lies et la roine ert lie

Et la cours fu mout envoisie,

Et li boins rois ki tant valoit

Se pourpensa lors k'il tenroit

Court la plus bele et la grignour

K'il onques tenist a nul iour,

Dont de mout grans tenir soloit;

Car ch'est la riens k'il plus voloit

Et ki plus li plaisoit a faire

Pour aloier et pour atraire

A lui les cuers des chevaliers.

Tant les amoit et tenoit chiers,

Ke ia nuls d'els, se il peust,

D'entor lui ne se remeust.

Et rice et grant et noble estoient

Li don ke toute iour avoient,

Car de ce n'iert ratiers ne chices.

Pour eus honnerer estre rices

Voloit sans autre baerie.

Ainc ne fu sa mains desgarnie

Toutes eures de grans dons faire,

Et il, li frans, li deboinaire,

Ke plus donna, et il plus ot. […]