The council of Armagh, 1170

…convocato apud Ardmachiam totius Hiberniae clero, et super advenarum in insulam adventu tractato diutius et deliberato, tandem communis omnium in hoc sententia resedit; propter peccata scilicet populi sui, eoque praecipue, quod Anglos olim tarn a mercatoribus quam praedonibus atque piratis emere passim, et in servitutem redigere consueverant, divinae censura vindictae hoc eis incommodum accidisse, ut et ipsi quoque ab eadem gente in servitutem vice reciproca iam redigantur. Anglorum namque populus adhuc integro eorum regno, communi gentis vitio, liberos suos venales exponere, et priusquam inopiam ullam aut inediam sustinerent, filios proprios et cognatos in Hiberniam vendere consueverant; unde et probabiliter credi potest, sicut venditores olim, ita et emptores tarn enormi delicto iuga servitutis iam meruisse. Decretum est itaque in praedicto concilio et cum universitatis consensu publice statutum, ut Angli ubique per insulam servitutis vinculo mancipati, in pristinam revocentur libertatem.

Two accounts of the second synod of Cashel, 1172

Giraldus Cambrensis.

Anno igitur Dominicae incarnationis MCLXXII, primo autem anno, quo illustrissimus Anglorum rex et Hiberniae triumphator ipsam insulam acquisivit, Christianus Lismoriensis episcopus et apostolicae sedis legatus, Donatus Cassiliensis, Laurentius Dubliniensis et Catholicus Tuamensis archiepiscopi cum suffraganeis suis et coepiscopis, abbatibus quoque, archidiaconis, prioribus et decanis et multis aliis Hiberniensis ecclesiae praelatis, ex ipsius triumphatoris mandato, in civitate Cassiliensi convenerunt, et de utilitate ecclesiae et statu eius in meliorem formam producendo, ibidem concilium celebrarunt. Huic concilio interfuerunt isti a rege missi, venerabilis vir Radulphus, archidiaconus de Llandaff, Nicholaus capellanus138 et alii clerici et nuntii domini regis. Concilii autem statuta subscripta sunt, et regiae sublimitatis auctoritate firmata.

• 1. Primo statutum est quod universi fideles per Hiberniam constituti, repudiato cognatorum et affinium contubernio, legitima contrahant matrimonia et observent.

• 2. Secundo, quod infantes ante fores ecclesiae catechizentur, et in sacro fonte in ipsis baptisalibus ecclesiis baptizentur.

• 3. Tertio, quod universi fideles Christi decimas animalium, frugum, ceterarumque proventionum ecclesiae (cuius fuerint parochiani) persolvant.

• 4. In quarto, quod omnes terrae ecclesiasticae, et earum possessiones ab omnium saecularium hominum exactione penitus sint immunes.