I COMPLAINTS ABOUT THE SINGERS

IA Letter from the getijdenmeesters of St Peter's to the sheriff, burgomasters and schepenen of Leiden (1450s?)

Aen mijn heeren vanden gherechte Schout bourghemeesteren ende scepenen der stede van Leyden

Die procuratoren vanden seven ghetijden in Sinte pieters kerck begheeren ende bidden mijn heeren om assistenci ende bijstant Aenghemerct die grote Arroren confuys dwalingh ende negligencie die daghelicx inder kercken voorn. gheschien god betert die wij niet en moghen noch en konnen resisteren corrigieren wederstaen noch verhoeden Want god niet ghedient noch gheeert en wort als betaemt ende behoirlick is als uu mijn heere wel kondich is dat ons zeer mishaget ende niet beteren en moghen sonder raet ende hulpe van uu mijn heeren / Soe bidden wij als boven dat mijn heren dese saken ter harten nemen willen ende dair in voirsien mit alle diligencie ende nairsticheyt / want dair grote macht an leyt ende die salicheyt ende welvaren van uu ende ons allen

Ende om mijn heeren een weynich advertancie te gheven alsoe wij die sake langhe ghehandelt Soe wair wel onse meenyng ende guetduncken dat men die muysique cesseren soude ende maken een heerlick choor van achte eerlijcke priesteren ende achte ofte ses koralen ende die souden singen statetelick sonder haesten datment verstaen mochte ende pauseren inden midden vanden versen als betaemt ende behoirlick is ende als in anderen kercken ghedaen wort dair guet regiment is

Ten anderen mael so souden dese voorn. sanghers singhen alle die votijff missen die inder kercken voirn. ghesonghen worden vanden scoolmeesteren ende souden die profijten hebben

Ten derden mael souden dese viij priesteren mitten koralen voirs. singhen die misse vanden heilighen cruyce des vrijdaechs / ende des saterdaechs die misse van onser liever vrouwen / Mer wij soe stijff niet en sijn dat wij dat loonen ofte betalen moghen Soe begheeren wij dat ghy mijn heeren dair of ordineren wilt want die incoomste vanden ghetyden so groot niet en sijn alsmen wel vermoet dat blijken sal alst mijn heeren belieft