(UMzwakhe uhamba ngemoto, ulibangise ezweni laseMozambique.)

MZWAKHE: (Ekhuluma kumakhalekhukhwini.) Kunjani bafo?

MAZIYA: (Ephendula.) Sekunguwe lowo Mzwakhe?

MZWAKHE: Yebo, yimina lo. Ake usho, unobani lapho?

MAZIYA: Okwamanje ngingedwa lapha ehhovisi, ungakhuluma masinyane. Sekusele ibanga elingakanani ufike lapha?

MZWAKHE: Ibhodi engiqeda kuledlula likhomba ukuthi sekusele amakhilomitha ayikhulu ngaphambi kokuba ngifike lapho.

MAZIYA: Cha, uyashesha mfana. Mina bengisazitshela ukuthi usekude, le ngakoMkhuze.

MZWAKHE: Kudala ngidlulile lapho. Lalela-ke, namhlanje ngihamba ngonyanyavu.

MAZIYA: Usho kanje mfowethu! Hlobo luni-ke lwemoto lolo?

MZWAKHE: Ngihamba ngeBMW 325i, hhayi indaba yokudlala. Umbala wayo uluhlaza okotshani, kanti izinombolo zayo zingezaseGauteng. Ngithemba ukuthi ngeke udideke.

MAZIYA: Kade ngangiwenza lo msebenzi Mzwakhe, ngeke libe khona nelincane iphutha. Uzothi ufika esangweni lomngcele ngizobe sengikulindele kudala. Imoto leyo ngizokwenza sengathi ngiyayihlola ukuthi yonke into iqondile kanti ngiyazindezela nje.

MZWAKHE: Hho, ngiyakuzwa . . .

MAZIYA: (Emphazamisa.) Ikhasimende usunalo nje?

MZWAKHE: Khululeka-ke ngalapho. Umthengi nguTembe, ungowaseXai Xai. Ngizohlangana naye kwelinye lamahhotela aseMaputo.

MAZIYA: Mina-ke ungiphatheleni?

MZWAKHE: Utwo stina. Nawe uyazazela nje!

MAZIYA: Ukhumbule ukuthi imali uyifaka emvilophini bese uyibeka esihlalweni esiseceleni kwesakho. Unganginiki yona esandleni, mina ngizozithathela esihlalweni leso.

MZWAKHE: Kulungile. Wena-ke usuzobona ngami.

(UMzwakhe usefike emngceleni okumele adlule kuwona. Ukhuluma nephoyisa eliqaphe kulo mngcele. Lenza sengathi liyayihlola imoto.)

MAZIYA: Usungaqhubeka nohambo lwakho ndoda. Konke kulungile.

MZWAKHE: Ngiyabonga.

(Esekhuluma yedwa.) Ngaphinde ngadabula ngingasaqali mina Shandu, uNdabezitha, uGumbilamagwala, uMthiya! Lesi silima sephoyisa esisebenza noMaziya asikhohliwe nje imoto kungeyami ngempela. NoMaziya uvele waliphotha lagcwala. (Elibala yindaba yephoyisa.) Sengifikile njalo kulo mgwaqo, u-Eduardo Mondlane. Kuthiwe ihhotela esizobonana kulo noTembe yiGoa Hotel. Ngabe likuphi lona leli hhotela uma umuntu eselapha? Sengiyabona manje, naliya ngaphesheya komgwaqo.

(Sekuqala ukuhwalala, uMzwakhe usefikile kuTembe.)

Ngiyethemba ukuthi nawe uzibonele Tembe ukuthi akukho okungekho kule moto, iyifull house yangempela. Ine-alamu, immobiliser, umsakazo osezingeni eliphezulu owakhiwe eJaphani, kuphinde kube khona neshuttle equkatha amaCD angamashumi amathathu.

TEMBE: Impela, nami ngiyazibonela. Usebenzile ndoda yamadoda. Thatha leli saka, liqukethe izinkulungwane eziyishumi zamarandi.

(UMzwakhe athathe isaka. Alivule, amoyizele ngenkathi elunguza ngaphakathi kulo.)

MZWAKHE: (Esukuma.) Asehlukane manje ngaph. . .

TEMBE: (Emphazamisa.) Ungakahambi Mzwakhe, kukhona umngani wami ofuna iveni eyi-one toner, ilong base. Ungamzamela yona?

MZWAKHE: Angazi, ngizokhuluma nobra KK. Nguyena ohlela zonke izinto. Ngizomazisa, yena-ke uzobe esexhumana nawe.

TEMBE: Ngizwa kahle. Uhambe kahle-ke mfowethu.

(Bahlukane emva kokuvalelisana.)