4 - Isigcawu sesine
Published online by Cambridge University Press: 11 November 2021
Summary
(UMaziya ukhuluma noKK ngocingo.)
MAZIYA: (Ekhuluma kumakhalekhukhwini.) Kunjani KK?
KK: Ngisaphila gazi lami.
MAZIYA: Lalela-ke mpintshi yami, isidle ugwayi.
KK: Ukhuluma ngani?
MAZIYA: Kade kufike amaHawks ezongifaka imibuzo. Babuze ukuthi …
KK: (Emngena emlonyeni.) Odoti laba, bafunani? Ngabe ubani obazise ukuthi siyazana?
MAZIYA: Ngisola sengathi kukhona elinye lamaduku engisebenza nawo elibatshele ukuthi nginokubonakala ngikhuluma nawe isikhashana eside kunabo bonke abantu abadlula emngceleni. Ngibonile ukuthi ngeke kusasiza uma ngibatshela ukuthi angimazi sanhlobo umuntu onjengawe.
KK: Usizile ngokuba ungangiphiki. Lokho bekuzokwenza ukuba babone ukuthi kukhona okufihlayo. Njengamanje, ayikho into abangayenza ngaphandle kobufakazi. Utheni-ke uma uphendula imibuzo yabo?
MAZIYA: Ungaphatheki kabi, bangibuze imibuzo ewumbhedo nje. Babuze ukuthi ngakugcina nini, nokuthi uvame ukudlula ngaziphi izikhathi emngceleni.
KK: Ubaphendule kahle.
MAZIYA: Kuzodingeka ukuba sihlale sivule amehlo. Kukhona okunuka santungwana.
KK: Khululeka lapho. Nginguchakide mina, uphunyukabemphethe.
MAZIYA: (Ebona amaphoyisa omgwaqo.) Angivalelise sayitsheni. Nawa amaphoyisa omgwaqo angaze anginike ithikithi.
KK: Shandis. (Abeke phansi ucingo bese ekhuluma yedwa.) Uma isimo sesinjena kuzodingeka ukuba kengithi ukushaywa umoya okwesikhashana. (Uyancinciza.) Hho! Ake ngivakashele ithekeni lami laseMamelodi. Kudala ngamgcina uPuseletso. (Ashayele uPuseletso ucingo.) Guess who is coming home tomorrow?
PUSELETSO: (Ephendula ucingo.) Ke bua le mang?
KK: Awusalizwa izwi lami? Ukhuluma noKK.
PUSELETSO: Hawu! Sakhunjulwa abantu baKwaZulu-Natali, sigezephi?
KK: Ngihlale ngikukhumbula ngaso sonke isikhathi. Inkinga nje ukuthi ngimatasatasa ngomsebenzi ongapheli.
(UKK athembise ukuthi uzomvakashela maduzane nje. Bavalelisane, bavale izingcingo.)
- Type
- Chapter
- Information
- Iqonde Kuphi le Ndlela? , pp. 67 - 70Publisher: University of South AfricaPrint publication year: 2012