Credo nos omnia, quae ad instructionem metricae disciplinae, velut quaedam primae institutionis incunabula, necessario his quibus huiusce artis voluptas ac studium est intimanda sunt, adfatim persecutos, unde nunc ad novem prototypa, id est primiformia omnium metrorum genera, e quorum fonte atque origine derivata innumerabilis metrorum profluit copia, stilum nostri operis convertam, de quorum disciplina et praeceptis et ratione omni, qua inter se congruunt sive dissentiunt, textus huius secundi voluminis singula quaeque reserans explicabit. auspicandum igitur ab eo nobis pede potissimum credidi, qui heroum metrum, principium omnium, continens etiam nominis sui appellatione signavit, siquidem non nulli ambigant, a quo e duobus metrorum ordinem inchoantes exordium capiant. nam qui ab iambo initium trahunt eo studio id fieri volunt, quod idem a brevi, a quo his origo est, incipiens tempore et in longo desinens, velut a minori ad maius egressus, per temporum incrementa consurgat. pyrrichius enim nullum ex se metrum ∥ edidit, trochaeus vero a longa incipit. nos autem, ut dictum est, principium metrorum omnium heroo sive pythio deferentes non absurde a dactylico auspicandum esse censuimus.

Igitur prototypa, id est primiformia novem metra, quorum et in primo mentionem fecimus, sunt | haec, e quis primum dactylicum, dehinc anapaesticum, post iambicum et trochaicum et choriambicum et antispasticum, ionicum ἀπὸ μείζονος, ionicum ἀπὸ ἐλάσσονος et paeouicum. nam proceleumaticam speciem novem prototypis decimam adsociandam esse quidam putant, de quo suo loco dicemus.