Clementissimo regi Rodulfo, Barnuinus, Viennensis, Isaac, Gratianopoli, item Isaac, Valentiȩ humiles episcopi, sedulam orationum caelebritatem et aeterni regni beatitudinem. Salva principaliter senioris nostri auctoritate, apostolico satisfacientes precepto, regiȩ, dignitati vestrȩ, non solum pro debito, sed et pro pio voto delectabiliter devoti, significamus vestrȩ celsitudini nos pro posse sollicitos persistere atque divinam pro vobis misericordiam, secundum nostrum officium, exorare, ut qui vos fecit in terris, ipse etiam faciat regnare in cȩlis. Interea necessarium duximus suggerere humiliter excellentiȩ vestrȩ ut, super causa fratris nostri, venerabilis coepiscopi Bernardi, quȩ vobis habetur notissima, nostrum pium in Christo studium paucis dignemini animum advertere. De quo qualiter et quociens vestra nos dignatio admonuerit, et quȩ nostra humilitas vobis significaverit, superfluum ducimus vestrȩ piȩ memoriȩ replicare. Hoc tantum vobis veraciter aperimus, non pro voluntate nostra, sed pro instantis temporis inexplicabili perturbatione, nos hactenus illius causȩ definitionem ȩcclesiasticam omisisse.