Invenit nuper doctissimus et rerum numismaticarum peritissimus, Carolus Combe, S. R. et S. A.S. in gazophylacio praestantissimo celeberrimi Guilielmi Hunteri, M. D. S. R. et S. A. necnon Societatis Regiae Scientiarum Parisien. focii, nummos, quales in Europa nondum vidimus, Palmyrenos, cujus characteres cum alphabeto Palmyreno contulit, et cum eo convenire deprehendit. Apparet in his nummis caput barbatum ad sinistram, cui tres literae a dextra et quatuor a sinistra parte adjectae sunt. Primam literam Γ jod esse doctissimus Combeus recte asserit. Licet enim in alphabeto Palmyreno [Philosoph. Transact. vol. XLVIII pag. 693.] paulo aliter scribatur: attamen in ipsis inscriptionibus Palmyrenis aliquoties eandem habet formam, quae in hoc nummo conspicitur.